ថៃ៖ គណៈកម្មការរៀបចំការបោះឆ្នោតថៃបានប្រកាសថា ប្រទេសថៃនឹងធ្វើការបោះឆ្នោតថ្នាក់ជាតិនៃថ្ងៃទី១៤ ខែឧសភាខាងមុខនេះ ដែលការប្រកាសនេះបានធ្វើឡើងត្រឹមរយៈពេលមួយថ្ងៃប៉ុណ្ណោះ ក្រោយពីសភាជាតិថៃត្រូវបានប្រកាសរំលាយ។ នេះបើតាមការបញ្ជាក់របស់លោក ឥទ្ធិផន ប៊ូនប្រាកង ប្រធានណៈកម្មការរៀបចំការបោះឆ្នោត។
ការប្រកាសនេះធ្វើឡើងនៅពេលដែលគណបក្សនានាបង្កើនការធ្វើយុទ្ធនាការសម្រាប់ការប្រកួតប្រជែងការបោះឆ្នោតទូទាំងប្រទេស ដែលប្រជាពលរដ្ឋកំពុងសង្កេតឃើញនូវការប្រជែងធគ្នារវាងក្រុមអភិរក្សនិយមយោធាដែលដឹកនាំដោយនាយករដ្ឋមន្ត្រីកំពុងកាន់អំណាចលោក ប្រាយុទ្ធ ចាន់អូចា ទល់នឹងគណបក្សភឿថៃដែលជាបក្សប្រឆាំងធំជាងគេដែលដឹកនាំដោយគ្រួសារមហាសេដ្ធីថៃត្រកូល ណាវ៉ាត់ត្រា។
លោក ប្រាយុទ្ធ បានប្រាប់ទៅកាន់ក្រុមអ្នកសារព័ត៌មានកាលពីថ្ងៃទី២១ ខែមីនាម្សិលមិញនេះថា នេះគឺជាពេលវេលាដែលត្រូវឆ្ពោះទៅមុខទៅរកការបោះឆ្នោត។ ការថ្លែងបែបនេះពិតមែន ប៉ុន្តែបច្ចុប្បន្នគណៈរដ្ឋមន្រ្តីរបស់លោកកំពុងបន្តដឹកនាំរដ្ឋាភិបាលជាបណ្តោះអាសន្នដដែល។ គួរបញ្ជាក់ថា ក្រុមគណបក្សនានាបានធ្វើការប្រមូលផ្តុំនិងមានសកម្មភាពជាច្រើនខែមកហើយ ប៉ុន្តែមួយរយៈចុងក្រោយសកម្មភាពនៃយុទ្ធនាការកាន់តែមានការកើនឡើងខ្លាំង។
គណបក្សភឿថៃត្រូវបានគេរំពឹងថានឹងរៀបចំព្រឹត្តិការណ៍ឃោសនាស្វែងរកសំឡេងឆ្នោតជារៀងរាល់ថ្ងៃនៅទូទាំងប្រទេសថៃ ដែលមានកូនស្រីរបស់អតីតនាយករដ្ឋមន្ត្រីថាក់ស៊ីន គឺលោកស្រី ប៉េតងតាន ណាវ៉ាត់ត្រាដែលបាននាំមុខខ្លាំងនៅក្នុងការស្ទង់មតិកន្លងមក ក្នុងនាមជាបេក្ខជនដែលមានសក្តានុពលបំផុតមួយរូបសម្រាប់តំណែងជានាយករដ្ឋមន្ត្រី៕
